TONINA, BEPO I NINO – MRIŽE SU SVUDA OKO NAS
Tonina: Nino, si kala mrižu?
Nino: San.
Bepo: Će bit srdel?
Nino: Valjda. Ne znan. Ne daju nan da tote kalamo.
Tonina: A ča moreš, triba čuvat srdele.
Nino: Je, a ki će meni nadoknadit trošak?
Bepo: Pa zna se — EU.
Nino: Aha, evo su zajno potekli. Ča njima znači jedan mali ribar?
Tonina: Niki dan reče moj nuk da u hiži nima mriža. I ja se čudin. Puna je garaža mriža.
Nino: A ča će mu mriža?
Tonina: Rekla mu maeštra da u školu donese mrižu jer nimaju mrižu, pa će delat morske pse u mriži.
Bepo: Zakoči malo. Kakovi sad morski psi?
Tonina: Ma nič važnega. Nego, taj isti dan je bija cirkus u hiži.
Nino: Daj, povidaj.
Tonina: Nuka je vikala po hiži da nima mriže, i ja pensan da i njena maeštra išće mrižu. Rečen joj da su mriže u garaži. Tornala se sva nervoža:
— Nono, ča me mutiš?
Tonina: I ja joj rečen da gre u kamaru i da se vadi.
Mala reče da se ne more vadit jer nima mriže.
Nino: Ja nič ne kapin. Ča će joj mriža da se vadi?
Bepo: Vero, ni ja ne kapin.
Tonina: Ma to ti je nika Wi-Fi mriža.
Bepo: A, čuja san.
Tonina: I ja san čuja da u školi imaju pet mriža da se vade.
Nino: Jebate, ča predikaš? Pa nije more u školi. Homo mi pit da te bolje kapin.
Natoče, nazdrave i nastave predikat.
Bepo: I ča delaju sa tin Wi-Fi mrižama?
Tonina: Vade se na internetu. Ma to nije sve. Ti Internet su ti niki valovi...
Nino: Ni dobro. Triba mriže molat.
Tonina: Daj muči, Nino, slušaj! Nisu ti to morski valovi. To su ti valovi koji gredu kroz nas.
Nino: Ti ne znaš ča predikaš. Šeko, si pijan? Kad je val proša kroz čovika? Ajde reči. Kad?
Tonina: Ma ja san čuja svakakove priče da niki ni sami ne znaju ča nan sve ti valovi delaju.
Bepo: Ča nan delaju ono?
Tonina: Samo na to pensaš! Hoj s vragon!
Bepo: Krepat, ma ne molat! Dok moren, ja ću ono delat.
Nino: Ma muči, šempjo, da čovik predika. Ne ometaj!
Tonina: I nike škole, sazna san iz „pouzdani izvora“, imaju po deset mriž koje in gredu kroz tilo.
Bepo: Ma ja san čuja da taj Internet čuda stvari more.
Tonina: Je, more. Al ponavljan — ja san se napunija priča o tin valovima, a pola ni sam ne kapin.
Nino: Moj nuk sutra ne gre u školu.
Bepo: Vero, ni moja Mala.
Tonina: Pomalo, ljudi! Reka je čovik od povjerenja da triba samo nazvat CARNET, ki je postavija te mriže, da ih briše.
Nino: Deset mriž! Znaš ti koliko je to riba? Mirakule!
Bepo: Ča zajebavaš, Nino? Hoj u vrit!
Tonina: Ja jeno, on drugo. Valovi su opasni.
Nino: Vero su.
Bepo: Ča, ako taj CARNET ne bude stija brisat, dica ne gredu u školu da se vade?
Nino: A ma, neka se vade doma.
Tonina: Eto ti ga na! Nino diže revoluciju.
Nino: Ja san ribar i iman mriže. Ne kapin taj Internet i ni me briga. Kega je briga za moje srdele? Reči, aaa?
Tonina: Šu, Nino, popij još jenu za moje zdravlje.
Nino natoči i naiskap popije.
Bepo: In vino veritas.
Tonina: Ča si reka?
Bepo: U vinu je istina.
Tonina: Otkud ti to znaš?
Bepo: S televizije.
Tonina: Jebala te televizija! I to su valovi.
Nino: Ja vas ne kapin. Valovi su na moru i basta.
Tonina: Šu, šu, Nino. Pij i stoj cito.
Bepo: Ja san čuja da nas s tin valovima prisluškuju. U mobitelu su i ništo delaju.
Tonina: Opet ti o delanju.
Bepo: Penis bonus, pax in domus.
Nino: Ča sad predikate kako oni zgor švalta?
Bepo: Ma to ti je latinski kojin su nekad predikali popi.
Nino: Dobro, i ča to znači?
Bepo: Dobar kurac, mir u kući.
Tonina: AHAHAHAHAHAHA! Pravo su te navadili popi! AHAHAHAHA! E, za ovo triba nazdravit!
Sva trojica dignu bićerine.
Svi: ZA MIR U KUĆI!!!
AHAHAHAHAHAHA!
Nino: Ja nis bija na vjeronauku kad se to vadilo.
Tonina: Ti se bavi svojin valovima i mrižama. Sutra ćeš nan povidat kako si pasa sa srdelami.
Nino: A vi sa vašin miron u kući.
Ahahahahahaha! Sva trojica se smiju.
AI & Mela
Komentari:
Za komentiranje je potrebna registracija.